Most expensive sentence of the history sold in 1738

ڈاکٹر ہرمن بورہیو کے انتقال کے بعد ان کا سامان کھولا گیا‘ سامان میں تین سوٹ‘ لکھنے کے چار قلم‘ کاغذوں کے درجنوں دستے‘ ایک چھتری‘ ایک بیڈ‘ ایک رائٹنگ ٹیبل‘ ایک آرام کرسی‘ کھانے کے چند برتن اور ایک کتاب تھی‘ کتاب مخملی غلاف میں لپٹی تھی‘ غلاف کھولا گیا ‘ کاغذ کا لفافہ برآمد ہوا‘ لفافے پر سیل لگی تھی اور سیل کے ساتھ ڈاکٹر ہرمن بورہیو کے ہاتھ سے لکھی تحریر تھی ” یہ کتاب میری پوری زندگی کی طبی تحقیق کا نچوڑ ہے‘ اس کتاب میں وہ نسخہ موجود ہے جس پر عمل کرنے والے کو زندگی بھر ڈاکٹر کے پاس نہیں جانا پڑے گا‘ میری یہ کتاب نیلام کر دی جائے اور نیلامی سے حاصل ہونے والے رقم لیڈن یونیورسٹی کے طبی ریسرچ انسٹی ٹیوٹ کو دے دی جائے“ یہ کتاب‘ کتاب نہیں تہلکہ تھی اور اس تہلکے نے پورے یورپ کو پریشان کر دیا‘ ہالینڈ‘ جرمنی‘ فرانس‘ اٹلی‘ برطانیہ اور آسٹریا کے شاہی خاندانوں اوریورپ بھر کے امراءاور رﺅساءمیں کتاب خریدنے کےلئے دوڑ لگ گئی‘ لیڈن شہر میں نیلامی کا بندوبست کیا گیا‘ یورپ بھر کے امرائ‘ رﺅساءاور شاہی خاندانوں کے نمائندے نیلامی میں پہنچ گئے‘ یہ یورپ کی تاریخی نیلامی تھی مگر ہم نیلامی کی طرف جانے سے قبل ڈاکٹر ہرمن بورہیو کے بارے میں جاننے کی کوشش کرتے ہیں‘ یہ کون تھا اور اس کی کتاب نیلامی میں کیوں رکھی گئی اور لوگ اس کتاب کو اتنا سیریس کیوں لے رہے تھے؟۔

 

 

ڈاکٹر ہرمن بور ہیو ہالینڈ کا رہنے والا تھا‘وہ 1668ءمیں لیڈن شہر میں پیدا ہوا‘ وہ مبلغ بننا چاہتا تھا‘ اس نے 1689ءمیں لیڈن یونیورسٹی سے فلسفے کی ڈگری حاصل کی‘ وہ تبلیغ پر روانہ ہونے لگا تو معلوم ہوا عیسائی مشنری مشن پر جانے سے قبل طب کی تعلیم حاصل کرتے ہیں‘ یہ دوسرے شہروں اور ملکوں میں جا کر چرچ بناتے ہیں اور اس چرچ کے ساتھ سکول اور ہسپتال کھولتے ہیں‘ مشنری علاج کےلئے آنے والے مریضوں اور سکول میں داخل ہونے والے بچوں پر خصوصی توجہ دیتے ہیں‘ یہ خصوصی توجہ عیسائیت کی تبلیغ کا سب سے بڑا ذریعہ ہے‘ ڈاکٹر ہرمن بورہیو کی معلومات درست تھیں‘ آپ آج پاکستان کے قدیم چرچز کا مشاہدہ کریں آپ کو ان کے ساتھ ہسپتال بھی ملیں گے اور کاﺅنٹ سکول بھی۔ یہ کاﺅنٹ سکول‘ یہ ہسپتال اور یہ چرچ انگریز دور میں عیسائی مشنریوں نے قائم کئے ‘ اسلام میں مدارس اور مطب کا تصور انہیں مشنری اداروں سے آیا‘ شام ظہور اسلام کے وقت عرب ملکوں میں عیسائی تہذیب کا مرکز تھا‘ مسلمانوں نے یہ ملک 634ءمیں حضرت عمرؓ کے دور میں فتح کیا‘ شام میں مسلمانوں نے کلیساﺅں کے نظام کا مطالعہ کیا ‘ مسلمانوں کو معلوم ہوا کلیساﺅں کے پادری اور ننیں طبیب اور استاد ہوتی ہیں‘ یہ لوگ چرچ میں مریضوں کا علاج بھی کرتے ہیں اور قرب و جوار کے بچوں کو جدید تعلیم بھی دیتے ہیں‘ مسلمانوں کو یہ طریقہ اچھا لگا چنانچہ اسلامی سلطنت کی مساجد میں بھی تعلیم اور علاج کا سلسلہ شروع کر دیا گیا‘ یہ سلسلہ آج تک جاری ہے‘ ہمارے مولوی صاحبان آج بھی استاد اور حکیم ہوتے ہیں‘میں واپس ڈاکٹر ہرمن بورہیو کی طرف آتا ہوں‘ ڈاکٹر نے اچھا مبلغ بننے سے قبل اچھا طبیب بننے کا فیصلہ کیا‘ اس نے ہارڈر وک یونیورسٹی کے شعبہ طب میں داخلہ لے لیا‘ اس نے طب پڑھنی شروع کی تو زندگی کے بارے میں اس کا سارا فلسفہ تبدیل ہو گیا‘ اسے معلوم ہوا خدمت تبلیغ سے کہیں بڑی عبادت ہے اور علاج انسانیت کی سب سے بڑی خدمت ہے‘ ڈاکٹر ہرمن بورہیو نے مبلغ کی بجائے طبیب بننے کا فیصلہ کر لیا‘ اس نے 1693ءمیں طب کی ڈگری لی‘ وہ 1701ءمیں لیڈن یونیورسٹی کے انسٹی ٹیوٹ آف میڈیسن میں لیکچرر بھرتی ہوا‘ 1709ءمیں نباتات اور ادویات کا پروفیسر بنا اور 1714ءمیں یونیورسٹی کا ریکٹر بن گیا‘ وہ اپنے دور کا مشہور ترین طبیب بھی تھا‘ بادشاہ اس سے علاج بھی کراتے تھے اور طبی مشورے بھی کرتے تھے‘ وہ اپنے دور کا مشہور ترین فطرت شناس‘ فزیشن اور ماہر نباتات تھا‘ وہ دنیا میں جدید طب کا بانی اور فادر آف فزیالوجی بھی تھا‘ وہ 23 ستمبر 1738ءمیں فوت ہوا تو اس کے سامان سے وہ مشہور زمانہ کتاب برآمد ہوئی جس میں اس کی عمر بھر کی طبی تحقیق کا نچوڑ تھا اور یورپ کے تمام امرائ‘ رﺅساءاور شاہی خاندان وہ تحقیق حاصل کرنا چاہتے تھے‘ کتاب کا نام تھا ” طبی تاریخ کا واحد اور قیمتی راز“ کتاب سربمہر تھی۔

نیلامی کا دن آ گیا‘ خریدار پہنچ گئے‘ نیلامی شروع ہوئی تو کتاب یورپ کے ایک بیمار رئیس نے اپنی تین چوتھائی دولت کے عوض خرید لی‘ اس نے وہ کتاب دس ہزار ڈالر میں خرید ی‘ یہ کتنی بڑی رقم تھی آپ یہ جاننے کےلئے کیلنڈر کو تین سو سال پیچھے لے جائیں‘ آپ کو1738ءکے دس ہزار ڈالر آج کے دس کروڑ ڈالر لگیں گے‘ اس دور میں عربی نسل کا شاندار گھوڑا دو ڈالر میں ملتا تھا اور آپ سو ڈالر میں دوسو ایکٹر زمین خرید لیتے تھے‘ یہ اس دور کی مہنگی ترین نیلامی تھی‘ رئیس نے کتاب خرید لی‘ وہ کتاب لے کر اپنے محل میں گیا‘ لفافے کی مہرتوڑی‘ کتاب نکالی‘ کتاب کھولی‘ کتاب کا پہلا صفحہ خالی تھا‘ دوسرا صفحہ کھولا گیا‘ وہ بھی خالی تھا‘ تیسرا صفحہ کھولا گیا وہ بھی خالی تھا‘ رئیس پریشان ہو گیا اور وہ تیزی سے صفحے کھولتا گیا اور پریشان ہوتا گیا کیونکہ کتاب کے سارے صفحے خالی تھے‘ یہاں تک کہ رئیس آخری صفحے تک پہنچ گیا‘ طبی تاریخ کا واحد اور قیمتی راز کتاب کے آخری صفحے پر لکھا تھا‘ وہ راز ایک چھوٹا سا فقرہ تھا‘ ڈاکٹر ہرمن بورہیو نے لکھا تھا ” تم اپنے سر کو ٹھنڈا اور پیروں کو گرم رکھو‘ تمہیں پوری زندگی کسی طبیب کی ضرورت نہیں پڑے گی“ خریدارنے راز پڑھ کر قہقہہ لگایا‘ کتاب سائیڈ پر رکھی اور آہستہ آواز میں بولا ” ڈاکٹر تم واقعی گریٹ انسان تھے“۔ ڈاکٹر ہرمن بورہیو نے اس چھوٹے لیکن کارآمد راز تک پہنچنے کےلئے پوری زندگی خرچ کر دی اور یہ فقرہ آج سے تین سو سال قبل مہنگا ترین فقرہ تھا‘ ہم اگر اس فقرے کو پڑھیں تو یہ ہمیں عامیانہ دکھائی دے گا اور ہم سوچیں گے ڈاکٹر ہرمن بورہیو یورپ کے امیروں کو بے وقوف بنا گیا‘ یہ کیا بات ہوئی آپ سو صفحے کی کتاب جلد کرائیں‘ آپ ننانوے صفحے خالی چھوڑ دیں‘ آخری صفحے پر 20 حرفوں کا ایک چھوٹا سا فقرہ لکھیں‘ کتاب پر سیل لگائیں‘ یہ کتاب بعد ازاں نیلام ہو‘ دس ہزار ڈالر کما لئے جائیں اور ایک بیمار رئیس اپنی دولت کا تین چوتھائی حصہ دے کر صرف اتنا سیکھے ” دماغ کو ٹھنڈا اور پیروں کو گرم رکھو“ یہ مذاق یا دھوکہ نہیں تو کیا ہے؟ لیکن آپ اگر گرم پیروں اور ٹھنڈے دماغ سے اس فقرے پر غور کریں تو آپ ڈاکٹر کی تحقیق سے بھی متفق ہو جائیں گے اور آپ کو اس فقرے میں افراد‘ خاندانوں‘ معاشروں‘ ملکوں اور قوموں کے عروج و زوال کی پوری تاریخ بھی مل جائے گی‘ آپ یقین کیجئے‘ آپ کسی شخص کا سر اور پاﺅں دیکھ کر اس کے مستقبل کی پیش گوئی کر سکتے ہیں‘ ہماری زندگیوں کا نوے فیصد دارومدار ہمارے فیصلوں پر ہوتا ہے‘ آپ تعلیم سے لے کر پیشے تک اور دوستوں سے لے کر شریک حیات تک اور رشتے داروں سے برتاﺅ سے لے کر معاشرتی رویوں تک پوری زندگی فیصلے کرتے ہیں اور یہ فیصلے آپ کی جسمانی‘ ذہنی‘ روحانی اور معاشرتی صحت سے لے کر آپ کے لائف سٹائل تک کا فیصلہ کرتے ہیںاور آپ اس وقت تک اچھے فیصلے نہیں کر سکتے جب تک آپ کا سر ٹھنڈا نہیں ہو گا‘ اسی طرح آپ اگر سپورٹس نہیں کرتے‘ واک نہیں کرتے اور جاگنگ نہیں کرتے تو آپ کے پاﺅں ٹھنڈے رہیں گے اور یہ ٹھنڈے پاﺅں بہت جلد آپ کو بستر مرگ تک پہنچا دیں گے‘ آپ کی باقی زندگی دوائ‘ ڈاکٹروں اور ہسپتالوں کے اردگرد گزرے گی چنانچہ آپ اگر اچھی‘ معیاری اور کلر فل زندگی گزارنا چاہتے ہیں تو آپ صرف دو کام کریں‘ آپ دماغ کو ٹھنڈا رکھیں خواہ آپ کو اس کےلئے کچھ بھی کرنا پڑے اور آپ اپنے پیروں کو گرم رکھیں‘ آپ روز واک کریں‘ جاگنگ‘ سائیکلنگ‘ تیراکی یا ایکسرسائز کریں‘ خواہ آپ کو اس کےلئے دہکتے انگاروں پر ہی کیوں نہ چلنا پڑے‘ واک سے آپ کا دوران خون ٹھیک رہے گا‘ لہو سر سے پاﺅں کی طرف آئے گا‘ آپ کی صحت اچھی رہے گی۔

 

 

آپ اگر اس فلسفے کو افراد سے معاشروں تک لے جائیں تو آپ بڑے دلچسپ حقائق دیکھیں گے‘ آپ کو دنیا کی ہر وہ قوم ترقی یافتہ ملے گی جس میں لوگوں کے دماغ ٹھنڈے اور پاﺅں گرم ہیں‘جس میں لوگ معاملات کو جذباتیت کے بجائے دلائل پر دیکھتے ہیں‘جس میں لوگ گفتگو کے دوران ٹھنڈے رہتے ہیں‘ جس میں لوگ دوسروں سے چلا کر مخاطب نہیں ہوتے‘ جس میں لوگ جلسوں اور جلوسوں کے دوران بھی ڈسپلن برقرار رکھتے ہیں‘ وہ توڑ پھوڑ نہیں کرتے‘ دوسروں کو گالی نہیں دیتے‘ دوسروں پر بلاتحقیق الزام نہیں لگاتے‘ دوسروں پر حملے نہیں کرتے اور جس میں لوگ کام کو صرف کام کے طور پر لیتے ہیں‘ اسے ذاتیات نہیں بناتے اور جن معاشروں میں پارکس‘ واکنگ ٹریکس‘ جم‘ میدان اور کلب ہوتے ہیں اور آپ کو وہاں صبح اور شام لوگ دکھائی دیتے ہیں‘ آپ کو یقین نہ آئے تو آپ امریکا سے لے کر چین تک دنیا کا مشاہدہ کر لیں آپ کو پوری جدید دنیا میں یہ دونوں خوبیاں نظر آئیں گی اور آپ اس کے بعد غیرترقی یافتہ یا پسماندہ قوموں کا مطالعہ بھی کر لیں‘ آپ کو دنیا کی تمام پسماندہ قومیں جذباتی‘ غیر منطقی‘ دلائل سے دور‘ لڑاکا‘ فسادی‘ شکی‘ بھڑکیلی اور شدت پسند ملیں گی‘ یہ صحن میں گیند گرنے‘ فصل سے جانور گزرنے‘ گھورنے‘ کھنگورا مارنے‘ تھوکنے‘ دوسری دکان سے سودا خریدنے‘ رشتہ نہ دینے‘ امتحان میں کم نمبر آنے اور میں جنتی ہوں اور تم دوزخی‘ میں مومن ہوں اور تم کافر جیسے ایشوز پر دس دس لوگوں کو قتل کر دیں گے‘ یہ انقلاب پہلے لانا چاہیں گے اور لوڈ شیڈنگ ختم کرنے کا طریقہ بعد میں ڈھونڈیں گے اور آپ کو پسماندہ قوموں کے پارکس میں بھینسیں اور گائے بھی چرتی نظر آئیں گی‘ آپ کو وہاں قبضہ گروپ بھی دکھائی دیں گے اور آپ کو ان کے سٹیڈیمز میں کھیلوں کی بجائے جلسے ہوتے بھی نظر آئیں گے اور آپ کو وہاں لوگ چلتے ہوئے کم اور بیٹھے ہوئے زیادہ نظر آئیں گے‘ آپ آج دنیا کو ٹھنڈے سروں اور گرم پیروں کے فلسفے سے دیکھ لیں‘ آپ کو انسان کی تاریخ بھی سمجھ آ جائے گی‘ انسان کا حال بھی اور اس کا مستقبل بھی اور آپ اپنے ذاتی اور معاشرتی زوال کی وجہ بھی جان جائیں گے‘ ہمارے سر گرم اور پاﺅں ٹھنڈے رہتے ہیں شاید اسی لئے ہم دنیا سے پیچھے رہتے ہیں‘ آپ ایک بار غور کیجئے‘ آپ ایک بار زندگی کو اس زاویئے سے بھی دیکھ لیں‘ شاید زندگی کا کھویا ہوا سرا آپ کے ہاتھ میں آ جائے‘ شاید آپ لائف کے ٹریک پر واپس آ جائیں۔